Samson var født i 1879. Han var bonde, postopnar, landpostbud og ein flink rokkemakar. Det er ikkje så få rokkar rundt om i landet som Samson har laga.
Samson hadde ein talefeil: Han kunne ikkje seia ”r”, men han klarte alltid å finna ord som det ikkje var r i. Ein rokk kalla han ”ein spinnemaskin”. Skulle han ha ein pakke 3 toms spiker, sa han ”Eg må få ein pakke 2” stift – ja du kan leggja til ein tomme”. Det er òg fortalt at den yngste dottera hans prøvde å terga han, ho spang rundt bordet og ropte ”Pappa kan ikkje seia r, pappa kan ikkje seia r!” Samson blei lei av dette og utbraut:”Teie du ikkje stilt skal eg svega deg onde stakken!”
Samson var i sine unge år ein stor skøyar og spilloppmakar. Ei jente som budde på Nordhuglo, må ha hatt eit godt auga til Samson, men han ville no prøva truskapen hennar. Ein kveld dei gjekk ein tur og var komne syd til Leiro, spurde han henne: ”Var det så at du ville følgja meg i gode og onde dagar?” Og ho lova at det skulle ho. ”Ja, då får du koma,” sa han og tok eit godt tak og dro ho med seg utover Leiro til sjøen nådde ho opp til livet. Ho skreik og bar seg men Samson meinte ho hadde lova å vera med han både i gode og onde dagar, så ho fekk berre følgje med. Då sjøen rakk opp til halsen på henne, fekk ho sleppa laus. Bella, som jenta heit, blei aldri gift – ho tok vel skrekken for mannfolk etter denne medfarten. Sjølv gifte Samson seg to ganger (den første kona hans døyde) – men det var altså ikkje med Bella.
Samson døydde i 1966.