Visste du at ein moderne bonde plasserar ein magnet i fyrste magen (av fire) som kua har? Magneten dreg til seg metall som kua får i seg med fóret, som spikar, t.eks. Då ligg metallet inntil magneten og rustar vekk av syren i kumagen. Og kua har ikkje noko ubehag av magneten.
Denne førast ned i kumagen med ein slange, og der vert den liggjande
MEN: Det finst jo metallar som ikkje reagerar på magnetisme. Som til dømes aluminium, og koppar. Boksane med øl og brus er laga av aluminium, koppar finn me mellom anna i ledningar. Boksar som vert kasta ut av bilvindu eller slept ned i vegkanten og som vinden tar tak i og legg frå seg i slåttenga, malar slåmaskina til mange kvasse metallbitar som vert til knivar i kumagen. Det same skjer med anna ikkje-magnetisk metall. Dyret som får dette i seg, døyr ein sers smertefull død, med blod rennande ut av kjeften. At bonden mistar både kua og produksjon, høyrer med til historia, men det er kanskje lidelsen til dyret me vil tenkje mest på neste gang me har ein tomboks i hendene.
Så difor: Ta vare på alt metall, få det til der det høyrer heime! Og alle me som går forbi og tenkjer at “det er ikkje eg som har kasta metallsøppel i vegkanten”: Ta det opp, pant boksen og spar ei ku for store lidingar!!
Slåmaskina hadde brote av bitar av denne kopparledningen. Det mørke på venstre side i øvste bilde er koppar.
