Den siste tida har breiflabb vore oftare i garnet enn lyr! Og dette er verkeleg festmat.
Det krev ein skarp kniv å få filetert halen og reinska han for dei kvite hinnene, men når jobben er gjort, står du igjen med to filéar som ein Michelin-restaurant ville misunt deg.
Dei kan godt liggja i kjøleskapet ein til to dagar, til du får invitert gjester. Da gjer du det meste av arbeidet på førehand:
Krydre fisken med sitronpeppar, og/eller ha på frisk timian eller kva du har av urtar. Utanpå festar du speikeskinka – bacon er óg brukt, men sjøl brukar eg altså speikeskinka. Den er salt, så da treng du ikkje salta fisken. 30 – 45 minuttar før gjestene kjem, set du eit steiketermometer i den tjukkaste delen av filéen, og set den i steikeomnen på 200 gradar. Ikkje oversteik! Da vert fisken tørr og krympar veldig. Ein kjernetemperatur på 62 gradar er akkurat passe. La fisken kvile bittelitt før du set han på bordet.
Til denne delikatessen kan du sjølvsagt servere kokte potetar og smelta smør i tillegg til krafta som sig frå fisken. Men kva med ei god potetstappe med mykje godt meierismør? Etter at du har stappa potetene og blanda i smøret, set du handvispen ned i gryta og piskar stappa litt – så vert den luftig og ekstra god! Vil du ha graslauk i stappa, har du i dette til slutt.
Brokkoli er ein god grønsak til, men til dette festmåltidet kan du kanskje vera meir kreativ? Ikke ver redd for å prøva noko nytt!
Velbekomme!
På fine restauranter kan du få servert steikte breiflabbkjaker. Men det er vel å dra han litt for langt for gjestene som kjem til breiflabb.
